طبيعة حوّا... بقلم / مرفت جابر .... مجلة تغريدات النوارس
طبيعة حوّا
كلمات مرفت جابر
............
انا عقلك
وانا جنونك
يا قلب القلب ف عيونك
وانا دارك
وانا جارك
وانا لحافك
وانا البنت اللي تتدلّع
وتتشعلق على كتافك
ولمّا الدنيا تتغابى
وتحجب نورها بسحابه
تسيب الدنيا وتجيني
تلاقي ف العيون كونك
م انا عقلك
وانا جنونك
وانا وقت السحاب شمسك
دفا يجري ف شرايينك
ولو بتشوفني بعيونك
ح تلقاني يادوب طفله
بتلعب سيجا قُدّامك
وتسرح جوّه أحلامك
فراشه ف قصرك الأخضر
مابين الورد تتمختر
وفوق الورد تتمايل
عليها العطر يتحايل
عشان تقطف ولو قطفه
تلاقي عينيك بتضحكلي
وف النظره تبان لهفه
يفلفص م الضلوع قلبك
وانا حسّه
وانا سامعه
وانا شايفه
وباعمل روحي مش عارفه
عشان شوقك يبان أكتر
طبيعة حوّا يا أدم
من الأشواق بتستكتر
وتتمايل
وتتغندر
وتخطف كام حفان سكر
من القلب اللي بات عاشق
عليها تقوم تبل الريق
وتملا من الهوى الأباريق
عشان تروي عطش قلبك
تداري دموعها جوّاها
وعز بُكاها تضحكلك
تكون بنتك
تكون أمك
ودايما حضنها يضمّك
يدفّيك وانت وقت البرد
ف سيب قلبك عيونه تمد
تشوفها حوريّه قُدّامك
وطفله ساعات بتتشاقى
ولمّا تشوفها مشتاقه
تحط هواها جوّه العين
وتقفل ع الهوى جفونك
م انا عقلك
وانا جنونك
وانا البنّوته تتشاقى
ياقلب القلب ف عيونك
......................................
ديوان خارج التصنيف
تعليقات: 0
إرسال تعليق