الدوده الدبوسية . بقلم /د. كرم الراوى .... مجلة تغريدات النوارس

س:- يا ترى ايه السبب اللي بيخلى الطفل الصغير يهرش بشدة من وقت الى آخر فى منطقة الشرج وتحديدا في فترات الليل ....وما هى دلالة هذا السلوك؟؟؟؟؟؟؟

ج:- السلوك ده بيكون سببه فى الغالب وجود ديدان تسمى بالديدان الدبوسية .

س:- وإيه علاقة الهرش بمنطقة الشرج بالديدان الدبوسية واشمعنى الهرش يعنى بيكون بالليل؟؟؟؟؟؟

ج:- لأن الديدان الدبوسية بتعيش داخل امعاء الطفل ومع ذلك لا تبيض داخل الامعاء ....ولكنها تتسلل ليلااثناء نوم الطفل لتخرج من فتحة الشرج فى شكل أسراب لتضع بيوضها حول فتحة الشرج ثم تدخل بعدها من فتحة الشرج الى الامعاء لتتغذىوهكذا

س:- طيب ما جاوبتش على سؤالى ...ايه علاقة الديدان الدبوسية بمسألة الهرش والحكة حول منطقة الشرج؟؟؟

ج:- لأن الدودة بعد ما تضع البيض حول منطقة الشرج بتعمل حاجة غريبة جدا

س:- ايه هى ؟؟؟؟؟؟؟

ج:- الدودة فيها شوكة طرفية ...بتقعد تدغدغ بالشوكة دى حول منطقة الشرج علشان تخلى الطفل يشعر بحكة شديدة فى المكان ده

س :- معقووول!!!! ....وايه اللي يخليها تعمل كدة ؟؟؟؟

ج:- علشان الطفل لما يهرش بايده فى المكان ده تقوم بيوضات الدودة تدخل ما بين ضوافر الطفل ...واول ما الطفل يحط صوابعه فى بقه او ياكل بايده تقوم البويضات تسقط مع الاكل وتفقس فى الجهاز الهضمى وتطلع ديدان جديدة وبكدة الدودة تضمن استمرار بقاءها داخل الطفل ....ودى بنسميها العدوى الذاتية

س :- يا بنت الايه .....طيب وازاى الدودة بتعرف ان طفل نايم او صاحى وازاى بتعرف تفرق ما بين الليل والنهار؟؟؟؟

ج:- عندها انظمة حسية ربنا اوجدها فيها بتخليها تمارس هذا السلوك اثناء فترات الليل فقط

س:- طيب ازاى بيتم علاج الطفل فى حالة اصابته بالديدان الدبوسية ؟؟؟؟؟؟

ج :- العلاج الدوائى وحده غير كافى

س:- ليه؟؟؟؟؟؟؟

ج:- لازم الاول اقص ضوافر الطفل لو كانت طويلة علشان امنع العدوى الذاتية .....الحاجة التانية لازم اغلى الغيارات الداخلية والملايات لجميع الاطفال بالبيت ...ولازم ارفع السجاد ان امكن

س :- هى وصلت للملايات والسجاد كمان ؟؟؟؟

ج:- لان بويضات الديدان بتتساقط من الطفل وهو ماشى او بيلعب على السرير ....وبالتالى البويضات دى ممكن تدخل الفم اثناء ركض او لعب الاطفال والمشكلة الاكبر لو دخلت الجهاز التنفسى ممكن تعمل خراريج بالرئة ومشكلات تنفسية

الحاجة الاخيرة ...لازم اعطى جرعة علاج الديدان لجميع الاطفال بالمنزل بما فيهم الكبار وتكرر الجرعة مرتين كل ١٥ يوم

وللحديث بقية ان شاء الله فى الجمعة القادمة

ولا تنسو مشاركة المنشور حتى تعم الفائدة

دمتم فى صحة

تحياتى

د/ كرم الراوى ( استشارى التحاليل الطبية )

هاتف / واتس :- 01155311385