الضغط والسكر وبعض الامراض سببها سوء العلاقات الاجتماعية .بقلم /د.كرم الراوى

لكم ان تتخيلو بأن معظم الأمراض العضوية اللي بيعانى منها غالبية المرضى زى امراض الضغط والسكر وأمراض القلب والصداع النصفى وجلطات الدم والذبحة الصدرية وامراض الجهاز الهضمى وقرح القولون والاثنى عشر والاضطرابات العضلية والاسهال المزمن ومشكلات المثانة والام التبول واضطرابات الدورة الشهرية وتأخر الحمل والمشكلات الجنسية.....الخ بيكون سببها مشكلات وضغوط نفسية وعصبية بسبب سوء العلاقات الاجتماعية وتدنى مستوى المعيشة وسوء الاحوال الاقتصادية والعمل المرهق وخلافه تحتاج الى علاج نفسى اكثر منه علاج عضوى

س : ممكن توضيح اكتر ؟؟؟

ج : الاساس فى المجال الطبى هو البحث عن مسببات الامراض وعلاجها وليس التركيز على علاج الاعراض باستخدام الادوية وتجاهل مسبباتها ...لان المشكلة سوف تظل قائمة والمشكلة ربما تتفاقم

س: طيب ايه هى علاقة الضغوط النفسية بمشكلات الجهاز الهضمى زى القئ والاسهال والامساك ومشكلات القولون ؟؟؟؟

ج: هناك علاقة شديدة جدا بين الجهاز العصبى المركزى والجهاز العصبى الحشوى بالاحشاء الداخلية وبالتالى هتلاقى الشخص عندما يتعرض لمشكلة نفسية او ظروف حياتية او ارهاق عصبى بالعمل ...العوامل دي بتؤثر على المنطقة المسئولة عن التوتر والانفعال بالدماغ اللي بدورها بتساعد على افراز هرمون الادرينالين بالدم وبالتالى هيحصل زيادة فى حركة واضطراب فى وظائف الجهاز الهضمى بواسطة افراز هرمونات عصبية بالجهاز الهضمى بتعمل لنا كل المشاكل اللي عارفينها زى القولون العصبى والتقرحى والاسهال وسوء الهضم والامساك والقئ احيانا ...الخ

س : طيب ازاى بيتسبب العامل النفسى فى حدوث مشكلات بضغط الدم ومشكلات بالقلب وأيضا حدوث جلطات ؟؟؟؟؟

ج : طبعا انا بتكلم عن المشكلات النفسية المزمنة اللي بتاخد وقت طويل مع الشخص وليس المشكلات النفسية المؤقتة ....فى الحالات دى بتلاقى الجسم يفرز كميات كبيرة من هرمون الادرينالين والكورتيزول اللي بدوره بيتسبب فى تسارع ضربات القلب وانقباض الشرايين ....المشكلة بقى ان ضغط الدم ممكن يرتفع ويوصل لمرحلة ينتج عنها انفجار فى بعض الاوعية الدموية بالدماغ وحدوث جلطات ....دا بالاضافة الى التأثيرات السلبية اللي بتنتج عن ارتفاع ضغط الدم وتأثيره على الكليتين لان معظم حالات الفشل الكلوى بيكون سببها الارتفاع المزمن فى ضغط الدم وتأثيره كمان على عضلة القلب لان الارتفاع المزمن لضغط الدم بيعمل مجهود مضعف على عضلة القلب وبيضعف كفائتها مع مرور الوقت وبيدخلنا فى مشكلات لا حصر لها

س : معقول سوء الظروف الحياتية تكون سبب غير مباشر فى كل المشكلات العضوية اللي بنعانى منها ؟؟؟؟

ج: اكيد طبعا زي ما وضحت

س: طيب الحل ايه والعلاج هيكون ازاى ؟؟؟؟؟

ج: العلاج جاء من قبل رب العزة سبحانه وتعالى فى كتابه العزيز وجاء فى سنة نبيه صل الله عليه وسلم

س : ازاي؟؟؟

ج: ربنا قال ( والكاظمين الغيظ والعافين عن الناس والله يحب المحسنين)

نحن السبب فى كل ما نعانى منه من مشكلات صحية سواء كانت نفسية او ما يترتب عليها من مشكلات عضوية ...افتقدنا لروح الود والتسامح فيما بيننا فاصبحت حياتنا عبارة عن صراعات طاحنة افقدتنا لذة الحياة ...اصبح الجميع يلهث وراء المال بشتى الطرق المشروعة وغير المشروعة حتى سلط الله علينا نعمه لتصبح نقمة علينا بسبب غياب القناعة ....اصبحنا نحمل انفسنا فوق طاقتها فى الوقت الذى أكد ربنا سبحانه وتعالى بأنه لا يكلف نفسا الا وسعها ....انتشار الظلم وغياب العدل والمجادلة بالباطل هو احد الاسباب الرئيسية فى ظهور تلك المشكلات النفسية

لا زلت مقتنع تماما بأن الانسان هو طبيب نفسه ..فى سلوكه الغذائى والحركى وفى معاملاته ...لا تعطى للأمور أكثر من حجمها ...لا تعطى للاحداث اهتماما اكبر مما تستحقه ...تعامل ببساطة وتلقائية كن متسامحا ودودا متواضعا مع غيرك ..لا تلهث وراء المال والسلطة والمناصب الزائلة .....واعلم تماما بأن حقوق البشر معلقه ولا تمحوها توبة ....ثم استعن بالله

دمتم فى صحة

تقبلو تحياتى

د/ كرم الراوى