سوء التحصيل الدراسى وعدم القدرة على التركيز اثناء شرح المدرس.بقلم د.كرم الراوى

من أكثر المشكلات اللي بيعانى منها اولياء الأمور مع ابنائهم التلاميذ وأيضا اللي بيعاني منها كمان غالبية الطلبة فى المراحل التعليمية المختلفة وهى

( سوء التحصيل الدراسى وعدم القدرة على التركيز اثناء شرح المدرس )

وما يترتب على تلك المشكلة من ضعف فى أرقام الدرجات بعد ظهور نتيجة الامتحانات

يبدأ الأهل بعدها فى تعنيف أبنائهم ومعاقبتهم أحيانا على الرغم من ان التلميذ او الطالب ممكن يكون بزل اقصى ما عنده من مجهود

السؤال هنا : هل من الممكن ان يكون هناك سبب طبى أو مشكلة طبية عند التلميذ او الطالب تسببت فى حدوث تدهور بدرجاته النهائية بعد ظهور نتيجة الامتحان؟؟؟؟؟؟؟وهل ممكن اننا نعالج الموضوع بشكل مبكر قبل الوقوع فيما لا تحمد عقباه ؟؟؟؟؟

الاجابة ( نعم )

س : ازاى

ج: باختصار شديد نقدر نقول بان تأهيل تلميذ أو طالب للمذاكرة والتحصيل الدراسى من المدرس أشبه بتأهيل لاعب لخوض مباراة رياضية ...

س : ازاى برضو ؟؟؟

ج : حركة اللاعب الرياضى داخل الملعب بتحتاج مجهود عضلى علشان يعرف يتحرك ويبزل مجهود من غير ما يتعب ويقدر يحرز اهداف ....ودا بيحتاج نظام غذائى معين لتنمية العضلات المسئولة عن الحركة ...اللي احنا بنسميها اللياقة البدنية

س : طيب وايه علاقة الكلام ده بالتحصيل الدراسى ؟؟؟

ج :لان نفس الكلام ده بينطبق على الطالب أو التلميذ ..

ودا لأن الاهتمام بالمجهود الذهنى لا يقل أهمية عن الاهتمام بالمجهود العضلى ..

س : ازاى برضو ؟؟؟؟

ج: علشان التلميذ او الطالب يقدر يستوعب كلام المدرس اثناء الشرح وعلشان يقدر يثبت كل المعلومات اللي بيذاكرها من الكتاب وكمان يقدر يسترجعها من ذاكرته بكل سهولة اثناء اداء الامتحان لازم الدماغ تكون مهيئة لكل تلك العمليات

س : ازاى بقى ...ما تجيب من الآخر وبلاش شرح كتير ؟؟؟

ج : ....خلاص هنختصر فى الموضوع ....ما ينفعش دماغ التلميذ او الطالب تكون مهيأة لأى تحصيل دراسى وهو بيعانى من الاصابة بالانيميا مثلا او انخفاض ضغط الدم نتيجة سوء التغذية او قلة عدد ساعات النوم

س : طيب ايه علاقة الكلام اللي بتقوله ده بالتحصيل الدراسى ؟؟؟؟

ج : لان الشخص المصاب بالانيميا بتكون عنده نسبة الهيموجلوبين المسئول عن نقل الاكسجين للمخ ضعيفة جدا ...يعنى كفائة المخ فى العمل والتحصيل الدراسى هتضعف وهيضعف معاها تركيز الطالب او التلميذ خصوصا وان الاكسجين يعتبر شئ اساسى علشان المخ يشتغل ويقوم بكافة وظايفه

نفس المشكلة هتقابلنا مع الاشخاص اللي مش بيهتمو بنظامهم الغذائى وبيطلعو على الدرس بتاعهم من غير ما يفطرو او يتغدو كويس او حتى ينوعو من مصادر الغذاء بتاعهم ....هلاقيهم دايما بيشعرو بهبوط عام وانخفاض فى ضغط الدم احيانا

س : طيب وايه علاقة الهبوط العام بالتحصيل الدراسى؟؟؟؟

ج : سؤال جميل ....لان هبوط ضغط الدم هيقلل كمية الدم اللي بتوصل للمخ علشان يشتغل وبالتالى المخ مش هيعرف يحصل كويس ....كمان كمية العناصر اللازمة لعمل المخ زى السكر او الجلوكوز نتيجة اهمال تناول الوجبات الاساسية هتكون ضعيفة جدا وبالتالى المخ مش هيعرف يشتغل فى ظل وجود نقص فى سكر الدم ...لان السكر هو الوقود الاساسى للمخ علشان يقدر يشتغل ويحصل جميع المعلومات

س : طيب وايه علاقة النوم بالتحصيل الدراسى ؟؟؟؟

ج : اى معلومات حضرتك بتذاكرها او بتسمعها من المدرس بتحتاج وقت علشان خلايا المخ تقدر تخزنها بحيث يسهل استذكارها فيما بعد ...ودى بتحتاج معدل نوم لا يقل عن ٦ الى ٨ ساعات نوم متصلة .

س : طيب ازاى اعرف ان ابنى او بنتى عندها مشكلة فى الحاجات اللي حضرتك شرحتها ؟؟؟ وازاى اتغلب عليها واتلافاها ؟؟؟؟؟

ج : دا اللي هنشرحه بالتفصيل فى الجمعة القادمة ان شاء الله....

دمتم فى صحة

تقبلوا تحياتى

د/ كرم الراوى

...............................

اختصار الردود

..................