عنصر الكالسيوم بالدم ..بقلم د/ كرم الراوى
 |
| د/ كرم الراوى |
عنصر الكالسيوم بالدم يعتبر من العناصر الاساسية والهامة للجسم للقيام بالعديد من الوظائف الحيوية
س :- طيب ايه هى أهمية عنصر الكالسيوم للجسم؟؟؟
ج- ناس كتير فاكرة ان اهمية الكالسيوم بتكمن فقط فى تكون ونمو العظام وما لوش اى دور تانى
س :- هو الكالسيوم ليه دور تانى غير نمو وتكوين العظام
؟؟؟
؟؟؟ج:- ايوة طبعا ...لدرجة ان نقص الكالسيوم فى الدم ممكن يتسبب فى مشكلات خطيرة جدا
س :- يا ساتر يا رب ...زى ايه مثلا؟؟؟؟؟
ج:- عنصر الكالسيوم مهم جدا فى عمل الجهاز العصبى وتحديدا توصيل التيار العصبى عن طريق الخلايا العصبية علشان كدة هتلاقى بعض الاشخاص عندهم تنميل فى اصابع اليدين والقدمين وفى محيط الفم بيكون سببه احيانا نقص عنصر الكالسيوم
- عنصر الكالسيوم مهم جدا فى طبيعة عمل عضلات الجسم علشان تشتغل بشكل سليم لدرجة ان الاشخاص اللي بيكون عندهم نقص شديد فى عنصر الكالسيوم بيكونو معرضين للتشنجات العضلية وبنلاقيها واضحة جدا فى العديد من حالات الاطفال
- عنصر الكالسيوم بيكون ليه اهمية كمان فى قيام عضلة القلب باداء وظيفتها بشكل طبيعى علشان كدة الاشخاص اللي عندهم نقص شديد فى عنصر الكالسيوم بيكونو معرضين لمشكلات فى عضلة القلب
- من الحاجات المهمة كمان للكالسيوم انه بيدخل ضمن عوامل تجلط الدم لوقاية الشخص من النزيف فى حال تعرضه لاى شئ ينتج عنه جرح يؤدى الى نزيف
وللاسف الشديد هناك بعض بائعى الفول المدمس بيحطو مادة اسمها ال EDTA على الفول المدمس علشان يستوى بسرعة ودى كارثة كبرى لأن مادة الاديتا بتقوم بترسيب الكالسيوم الموجود بالدم وبالتالى يفقد الجسم القدرة على سد الجرح فى حال تعرضه لجرح نزفى وبالتالى استمرار النزيف
دا بالاضافة الى التأثير المسرطن لتلك المادة
س - طيب الموضوع بسيط جدا وانت مكبره ع الفاضى
انا اروح اعمل تحليل كالسيوم ولو لقيت نسبته منخفضة اركز فى أكلى على الحاجات الغنية بالكالسيوم زى اللبن والبيض او ممكن اخد اقراص كالسيوم ؟؟
ج- هتفضل طول عمرك غشيم ؟
س- 
!!! ليه كدة بس ؟؟
!!! ليه كدة بس ؟؟ج- فى المجال الطبى هناك مبدأ ..قبل ما تبدأ فى العلاج حاول تدور على الاسباب وصلحها الأول....يعنى بالبلدى كدة قبل ما تنفخ فى القربة اتأكد انها مش مخرومة 
س - ازاى يعنى ...هى حسبة برمة ولا ايه ؟؟
؟؟ج- ببساطة شديدة لو الشخص اللي عنده نقص فى نسبة الكالسيوم بالدم كان عنده كمان نقص فى فيتامين ( د )جسمه مش هيستفيد باى كالسيوم هتديهوله سواء كان اكل او ادوية
س - ليه كدة ....هو ايه علاقة فيتامين د بالكالسيوم؟؟
ج- لأن عنصر الكالسيوم لا يتم امتصاصه الا فى وجود فيتامين ( د) يبقى قبل ما نفكر اننا نندى كالسيوم لازم نظبط نسبة فيتامين ( د) بالجسم
ومن حكمة ربنا سبحانه وتعالى اننا ممكن نحصل على فيتامين د من الطبيعة عن طريق تعريض الجسم لأشعة الشمس لمدة ساعة على الاقل فى الصباح الباكر لان اشعة الشمس بتقوم بتحويل الكوليسترول الموجود بالجسم الى فيتامين د يعنى فايدة مزدوجة فى اننا نقلل نسبة الكوليسترول بالجسم ونعيد تدويره ونحوله الى فيتامين د مفيد بشكل طبيعى ...بس خد بالك لازم الجلد نفسه يكون معرض للشمس من غير هدوم....
وللحديث بقية ان شاء الله
دمتم فى صحة
تقبلوا تحياتى
د/ كرم الراوى
تعليقات: 0
إرسال تعليق