الشعوربالدوخه اثناء الوقوف.بقلم د.كرم الراوى
 |
| د.كرم الراوى |
س: احيانا اشعر بدوخة ودوار وصداع اثناء الوقوف او بعد الاستيقاظ من النوم او لما اقوم مرة واحدة من وضع الجلوس ...فهل يوجد تفسير لهذا الامر ولا اروح اكشف عند طبيب مخ وأعصاب ؟؟؟؟
ج: اولا من الامور الخاطئة اننا نجرى بسرعة على طبيب مخ واعصاب مع كل مشكلة او اعراض بتظهر علينا زى الصداع أوالدوخة ...الخ ......لان غالبية تلك الاعراض بيكون سببها حاجات تانية بعيدة تماما عن وجود اى مشكلة فى المخ نفسه بدليل انك بتروح تعمل اشعة على المخ وتطلع سليمة تماما وتظل المشكلة كما هى
س: طيب ايه هى الحاجات التانية اللي ممكن تكون هى سبب فى ظهور تلك الاعراض؟؟؟؟
ج: لو تحديدا ظهرت عليك أعراض دوخة او دوار وعدم اتزان اثناء الوقوف
-أولا لازم تقيس ضغط الدم عندك ..لأن ممكن يكون ضغط الدم عندك منخفض ..لان كمية الدم اللي بتوصل للدماغ فى حالة الضغط المنخفض بتكون ضعيفة خصوصا اثناء الوقوف ....وبعدين من الاخطاء الشائعة اننا بنقيس الضغط مرة واحدة ....فلازم نقيس الضغط ثلاث مرات على مدار اليوم ويكون الشخص فى حالة استرخاء تام علشان نحكم على الضغط انه مظبوط....ولو لقيت ضغط دمك منخفض ما تقلقش
لان ضغط الدم المنخفض ليس مرض ولكنه عرض لسوء تغذية او افتقاد الجسم لبعض العناصر والاملاح او الاصابة بالانيميا ...وجميعهم يسهل علاجهم
- ثانيا : ممكن اعراض الدوخة والصداع يكون سببها وجود التهاب غير واضح ليك فى الأذن السطى أو الداخلية ....وبالتالى لازم نعمل زيارة لطبيب أنف وأذن علشان نتأكد من سلامتها وأنها بريئة من ساحة الاتهام
- ثالثا : مشكلات النظر والابصار ليها دور كبير فى ظهور اعراض الدوخة والصداع على الشخص وبالتالى لازم نعالج اي مشكلة فى العيون خصوصا الناس اللي بتستخدن نظارات طبية ....ربما يكون الشخص محتاج لتغيير مقاس العدسات او علاج مشكلة فى العين نفسها
س: طيب ايه هى الاسباب التانية اللي ممكن تسببلى صداع مزمن وزغللة احيانا ؟؟؟؟
ج - فى الحالة دى لازم نسأل نفسنا كذا سؤال :-
السؤال الاول : هل انا عندى مشكلة فى الجيوب الانفية ...لان التهابات وحساسية الجيوب الانفية بتسبب للشخص صداع مزمن احيانا ...وبالتالى لازم نزور طبيب انف واذن ...لان مشكلة الصداع هنا مش هتتحل الا لما نحل مشكلة الجيوب الانفية
السؤال التانى : - هل انا عندى مشكلة فى ضغط الدم ...علشان كدة لازم نقيس الضغط تلات مرات ونطمئن ان ضغط الدم سليم ....لان ارتفاع الضغط بيسبب صداع ....
السؤال التالت : هل انا عندى مشكلة او التهابات فى الاسنان ؟؟؟.....لان التهابات الاسنان بتسبب للشخص صداع مزمن ....وبالتالى مشكلة الصداع مش هتتحل الا لما احل مشكلة التهاب الاسنان عند طبيب اسنان
السؤال الرابع : هل انا عندى انيميا ؟؟؟ ...لان اصابة الشخص بالانيميا بتسبب ليه صداع مستمر ....علشان كدة لازم نعمل تحليل صورة دم ....ودا لان علاج الصداع فى الحالة دى بيكون مرهون بعلاج الانيميا
السؤال الخامس : يا ترى ان بنام كويس ولا بنام عدد ساعات قليل ؟؟؟ ودا لان قلة عدد ساعات النوم مع وجود ارق مستمر برضو بيسبب للشخص صداع من وقت للتانى ....وبالتالى لازم ننام ٨ ساعات متصلة علشان الجسم والدماغ يستعيد نشاطه وحيويته
تمنياتى لكم بدوام الصحة والعافية .
تقبلو تحياتى
د/ كرم الراوى
تعليقات: 0
إرسال تعليق