فصل الشتاء.. بقلم د.كرم الراوى
 |
| بقلم د.كرم الراوى |
سؤال : مع دخول فصل الشتاء....تظهر لدى بعض الاشخاص المعاناة من اعراض مرتبطة بتكرار الرغبة فى التبول ودخول الحمام على فترات متقاربة ...لدرجة ان هناك من يستيقظ من نومه العميق ليدخل الحمام من وقت لآخر اثناء الليل ...فما تفسير هذا الأمر ؟؟؟؟
ج: اولا يوجد اسباب فسيولوجية طبيعية وأسباب تانية مرضية بتكون سبب فى زياد تكرار الرغبة فى التبول
س: طيب ايه هى الاسباب الفسيولوجية ؟؟؟؟
ج: الاسباب الفسيولوجية زى حضرتك لما بتكون شارب حاجات بتحتوى على مدرات للبول زى الشاى والقهوة الكتير والمشروبات الغازية وبرضو المدخنين لان الحاجات دى بتحفز الكليتين على ادرار البول وبالتالى امتلاء المثانة بالبول بشكل سريع ...ودا اللي بيخليك تشعر برغبة ملحة فى التبول بشكل مستمر
س : طيب ايه هى الاسباب المرضية اللي بتخلى الواحد بيشعر برغبة مستمرة فى التبول على فترات متقاربة؟؟
ج : فى الحالة دى هسألك مجموعة من الاسئلة وبناء على اجابة حضرتك هنحاول نوصل للسبب .
س : لما بتشعر برغبة فى التبول ...هل كمية البول بتكون كبيرة ولا قليلة ؟؟؟ وهل البول بينزل متدفق ولا متقطع ؟؟؟ وهل بتشعر بالم أو حرقان اثناء او بعد التبول ؟؟؟ وهل الرغبة فى التبول بتوصلك لمرحلة انك بتصحى من نومك علشان تدخل الحمام؟؟؟
ج : للاسف الشديد بتجينى رغبة شديدة فى التبول على فترات متقاربة وببقى مزنوق على الآخر ولما بدخل الحمام بلاقى كمية البول قليلة جدا ومتقطعة على عكس ما كنت متوقع لدرجة انى بكون مستغرب واحيانا بصحى بالليل من النوم برضو مزنوق على الآخر وبلاقى كمية البول قليلة برضو وبيكون فيه الم بسيط وحرقان بعد التبول مع تقطع فى البول ...والموضوع ده عاملى قلق نفسى..ايه السبب؟
ج - فى الحالة دى ممكن حضرتك يكون عندك التهاب فى البروستاتا أو التهاب فى المثانة ولازم تزور طبيب مسالك بوليه ...لان غدة البروستاتا لما بتكون ملتهبة او فيها احتقان او تضخم فبيخليها تضغط على المجرى البولى فى بداية الجزء المتصل بالمثانة ودا اللي بيخليك بتشعر برغبة فى التبول وبيخلى البول بينزل متقطع نتيجة الانضغاط الواقع على مجرى البول
س : هنسأل نفس السؤال السابق لشخص آخر ؟؟؟؟
ج : انا بدخل الحمام كتير ....بس كمية البول بتكون غزيرة جدا ولون البول بيكون صافى زى المية لكن مش بحس بالم او حرقان بعد التبول وبيكون البول متدفق ومفيش تقطع فيه
س : طيب هل حضرتك بتشرب شاى كتير او قهوة كتير او مشروبات غازية كتير او مدخن ؟؟؟؟ وهل الموضوع ده مستمر معاك فى الشتا والصيف كمان ...وهل بتشعر بالعطش وريقك ناشف على طول ؟؟؟؟
ج - بشرب شاى فى العادى جدا ومدخن ...بس الموضوع ده ما كانش بيجينى قبل كدة الا من وقت قريب ....بحس برغبة فى التبول على الطول وبحس بالعطش كمان ...والموضوع ده ملازمنى شتا وصيف يا ترى ايه السبب ؟؟؟
ج : فى الحالة دى لازم تعمل تحليل سكر تراكمى علشان تطمئن على نسبة السكر بالدم ....ودا لان ارتفاع نسبة السكر بالدم بيزود الضغط الاسموزى داخل الاوعية الدموية وبالتالى انتقال الماء من الفراغ الخلوى للخلايا الى داخل الاوعية الدموية فهتزيد نسبة المياه بالدم اللي هيزود بالتالى ادرار البول عن طريق الكلى وامتلاء المثانة فى وقت قصير جدا ...ودا اللي بيخليك تعطش كتير وتدخل الحمام كتير لو كنت مصاب بالسكر
وللحديث بقية ان شاء الله
دمتم فى صحة
تقبلو تحياتى
د/ كرم الراوى
تعليقات: 0
إرسال تعليق